Altsasuko Jaiak hasi dira, inoiz baino lehenago, gainera. Izan ere aurten jaiak ohikoa den 13an hasi beharrean ostegunez hasi baitira, hilaren 10ean. Lehenengo eguna jairako ez ezik gure artean ez daudenak gogoratzeko izan ohi da, baina urte honetan ez dute baimendu txoznetan Sakanako presoen argazkiak jartzea. Hori dela eta argazki erraldoiak itsasi ziren herriko hainbat lekutan, presoen aldeko brindisa egin aurretik. Ondoren herri bazkari bat ere egin zen Iortian dagoen herri-karpan.

Baina gauean jaia egin dutenek gaur ez dituzte argazkiak ikusi, izan ere goizean goiz udaleko langileek argazkiak kendu eta hainbat margoketa ere ezabatu dituzte. Euren argudioa poliziak kendu ezean sartuko zirela. Baina hori ez da izan sorpresa bakarra: udalak jarritako ikurrinak ere desagertu dira, Nafarroako banderak baino ez dituztelarik utzi herriko faroletan.

Nafarroa Baik ez du oraindik argitu zergatik kendu dituzten argazkiak ez zein izan den ikurriñak kentzeko arrazoia, baina horrela Altsasuko euskalduntasuna eta presoen oroitzapenarekin bukatuko dutela uste badute jai dute!